Arquivo da categoría: x

Clorofila

Os alumnos e alumnas de 6º de Primaria, tiñan unha dúbida…

Se a clorofila é a encargada de realizar xunto coa luz a fotosíntese e a responsable da cor verde das plantas, terán clorofila as plantas que son doutra cor?

Para averigualo primeiro reflexionaron na aula sobre estas cuestións, logo fixeron unha investigación, pero finalmente puideron comprobalo a través dun experimento. Mediante unha técnica chamada cromatografía puideron observar os pigmentos que existen en cada unha das especies seleccionadas e confirmar a existencia en ambas de clorofila. Nas imaxes pódese ver como eses pigmentos van aparecendo nunha tira de papel poroso a modo de bandas coloreadas.

“Contos por teléfono”

O xoves día 7 de outubro os nenos e nenas de 6º de primaria realizaron unha saída á Casa da Cultura para participar nunha actividade relacionada con Xela Arias e a súa faceta de tradutora. No evento participaron diferentes personalidades do Concello e a Presidenta do Consello Galego da Cultura. A actividade realizada por Charo Pita consistiu na narración dalgúns dos contos que Xela traduciu á lingua galega, concretamente a obra literaria “Contos por teléfono” de Giani Rodari. Esta magnífica obra relata as historias que o protagonista, o Sr. Bianchi de Varese, relataba á súa filla cada noite ás nove en punto cando se atopaba de viaxe por mor do seu oficio. Puidemos escoitalos e mesmo interaccionar coa narradora Charo Pita, que nos deleitou e mergullou coa súa voz e posta en escena en cada unha das historias. Os nenos e nenas desfrutaron moito coa actividade e tamén polo feito de poder realizar unha saída neste tempo, aínda complicado. Queremos tamén dar as grazas ao Concello pola súa invitación a este evento.